خليفو محمد سجاول خان: ناليوارو حڪيم خليفو محمد سجاول خان ولد حڪيم خليفو محمد باقر چانڊيو، 1833ع ڌاري ڳوٺ ستاڻي چانڊيي ۾ ڄائو. هن ابتدائي تعليم پنهنجي ڳوٺ مان حاصل ڪئي. فارسي ۽ عربيءَ جي تعليم روهڙيءَ جي مشهور عالم مولانا محمد صالح مهيسر کان ۽ طب جو علم پنهنجي والد کان سکيو. والد جي وفات کانپوءِ سردار غيبي خان چانڊيي جو شاهي حڪيم مقرر ٿيو. 1876ع ۾ غيبي خان جي وفات بعد سردار غيبي محمد خان اول وٽ رهيو. 1893ع ۾ غيبي خان اول مارجي ويو ته سردار غيبي خان ثانيءَ جو صلاحڪار ۽ شاهي حڪيم مقرر ٿيو. هن پنهنجي گهر ۾ هڪ ننڍو طبي درسگاهه کوليو هو، جتي ڪيترن شاگردن کي علمِ طب جو درس ڏيندو هو. سندس درسگاهه مان جيڪي قابل شاگرد علم طب جي تحصيل ڪري نڪتا، تن ۾ حڪيم خليفو جان محمد حجم، حڪيم حاجي عبداللطيف چانڊيو (ساکاڻي)، حڪيم محمد لائق سيال، حڪيم خليفو شفيع محمد عباسي، حڪيم وڏيرو غلام محمد خان ٻرڙو، حڪيم محمد صالح چانڊيو، حڪيم عبدالمجيد ۽ حڪيم خليفو عبدالمجيد قابلِ ذڪر آهن. خليفي صاحب کي علمِ طب جي مشهور ڪتاب ’طب اڪبر‘ جا ٻئي جلد برزبان ياد هئا. علم طب بابت پنهنجي والد جو اڌ ۾ رهيل ڪتاب ’جواهر الحڪمت‘ لکي پورو ڪيائين. ان کان سواءِ هن هيٺيان ڪتاب تصنيف ڪيا: (1)’مولودن ۽ مناجاتن جو بياض‘ (2) ’ڪنز التشخيص‘ (فارسي). خليفي محمد سجاول، 3 رمضان 1337هه مطابق 2 جون 1919ع تي وفات ڪئي
1919.06.02 عيسوي
خليفي محمد سجاول، 3 رمضان 1337هه مطابق 2 جون 1919ع تي وفات ڪئي